Bu praktiki vəsait mülki hüquq üzrə praktiki təhlil bacarıqlarının formalaşdırılması məqsədi ilə hazırlanmış 44 kazusdan ibarətdir. Kazuslar vərəsəlik hüququ, əşya hüququ, öhdəlik hüququ, ailə əmlak münasibətləri, daşınmaz əmlak dövriyyəsi, nümayəndəlik, xarici elementli mülki münasibətlər və notariat fəaliyyəti ilə bağlı tipik hüquqi problemləri əhatə edir. Kazuslar müxtəlif xarici mənbələrdə istifadə olunmuş praktiki hüquq tapşırıqlarının fakt modelləri əsasında Azərbaycan hüquqi mühitinə uyğunlaşdırılmışdır. Mətnlər sözbəsöz tərcümə deyil; tədris məqsədi ilə yenidən işlənmiş, Azərbaycan mülki hüquq və notariat praktikası üçün aktuallaşdırılmışdır. Vəsaitin məqsədi hüquqi normanı mexaniki tətbiq etmək deyil, faktiki halları sistemli təhlil etmək, əsas və ikinci dərəcəli hüquqi məsələləri ayırmaq, hüquqi riskləri müəyyənləşdirmək və mülki-hüquqi nəticəni əsaslandırmaq bacarığını inkişaf etdirməkdir. Vəsaitdə hər kazus eyni metodik model üzrə verilir: faktiki hallar, tapşırıq və müzakirə istiqamətləri. Bu quruluş oxucunun hüquqi problemi ayırmasına, tətbiq ediləcək normaları müəyyən etməsinə və praktiki nəticə çıxarmasına kömək edir.